Ամռանն ընդառաջ DMS-ին դիմել էր Lumiere Optics-ը՝ ամառային եղանակի գալուստը զվարճալի և հետաքրքիր կերպով «տոնելու» խնդրանքով:
Lumiere Optics-ը, հանդիսանալով օպտիկայի մասնագիտացված սրահների ցանց, ցանկանում էր իր միջին և բարձր կարգի ակնոցների (Ray Ban-ից մինչև Tom Ford և այլն) վաճառքը բարձրացնել:
Որոշվեց սկսել ինֆլուենսեր մարքեթինգիարշավ: Ինֆլուենսերները պետք է տեսանյութեր հրապարակեին՝ առաջարկելով տարբեր լուքեր նշված բրենդերի ակնոցներով, ցույց տային՝ որոնք են իրենց համար նախընտրելի տարբերակները և ընդհանուր առմամբ ցուցադրեին ակնոցները:
Ինչպես և ցանկացած նախագծի, հատկապես ինֆլուենսեր մարքեթինգի արշավի դեպքում որոշակի խնդիրներ պետք է լուծվեին և վերացվեին ինչպես նախագիծը սկսելուց առաջ, այնպես էլ մեկնարկից հետո:
Առաջին խնդիրը, որ պետք է լուծեինք, ինֆլուենսր արաշվի արդյունքում գեներացված վաճառքներն էին: Նախկինում նմանօրինակ նախագծերի ժամանակ Lumiere Optics-ը այս խնդրին լուծում չէր կարողացել գտնել: Հետևաբար, սա հաճախորդի համար խնդիր էր, որը պետք է լուծում ստանար:
Քանի որ Lumiere Optics-ի կայքը պատշաճ չէր գործում, առցանց վաճառքներին հետևելը գրեթե անհնարին էր: Մենք խորհուրդ տվեցինք որպես լուծում յուրաքանչյուր ինֆլուենսերի տրամադրել կուպոնի կոդ՝ իր լսարանի հետ կիսվելու համար, օրինակ՝ Madonna20, որը տալիս էր 20% զեղչով գնելու հնարավորություն սահմանված ժամկետում: Երբ հաճախորդը գնում էր ապրանքը և ներկայացնում էր խանութի աշխատակցին կուպոնի կոդը, կազմակերպությունը ֆիքսում էր, որ վաճառքը տեղի է ունեցել հենց արշավի արդյունքում։
Երկրորդ կարևոր խնդիրը, որ պիտի լուծեինք ինֆլուենսերի մոտ ոչ իրական, մեր լեզվով ասած լցրած, լսարանների առկայության վտանգն էր: Մենք որոշել էինք արշավն իրականացնել 50,000 հետևորդներ ունեցող ինֆլուենսերների հետ, որոնք կարող էին ունենալ նաև լցրած լսարաններ։ Այդ իսկ պատճառով, նախքան նախագծի համար ինֆլուենսերների ընտրելը մենք ուսումնասիրեցինք և վերլուծեցինք մի շարք Instagram/Facebook ինֆլուենսերների լսարաններ՝ օգտագործելով analisa.io կայքի գործիքները և վերջիններիս շրջանակը կրճատեցինք՝ ներառելով միայն այն ինֆլուենսերների հաշիվները, որոնք միջինում ունեին ներգրավվածության 3%-ից բարձր ցուցանիշ, ինչն ապահովում էր իրական հետևորդներ ունենալը։
Այնուհետև, արշավի համար 3 ինֆլուենսեր ընտրելուց հետո խնդրեցինք նրանց վիճակագրությունը՝ վերջիններիս սպամային միավորները և ներգրավվածության ցուցանիշը հավելյալ ստուգելու համար: Երեք ինֆլուենսերները, որոնք համապատասխանում էին մեր ընտրության չափանիշներին, Մադոննա Հարությունյանը, Դիանա Մալենկոն և Լիլիթ Մուրադյանն էին:
Արդյունքները նույնիսկ գերազանցեցին մեր սպասելիքները: Ինֆլուենսերների տեսանյութերը հավաքեցին 53,355 10 վայրկյանանոց տեսանյութերի դիտումներ արշավի առաջին շաբաթվա ընթացքում և միջինում 3.8% ներգրավվածության ցուցանիշ, որն արտացոլվեց կրկնակի վաճառքների մեջ: Արշավն ունեցավ ներդումների 100% վերադարձ (ROI), որը նմանատիպ նախագծի համար բավականին բարձր է։ Սա նշանակում է, որ արշավը գեներացրել է ծախսերի համեմատ 2 անգամ ավել վաճառքներ։
Բացի այդ, հաջողված համագործակցությունից հետո երեք ինֆլուենսերներն անգամ որոշեցին անվճար իրենց սթորիներում կիսվել արշավի մասին: